🔴الشمعدان في اخبار شيوخ ديار السودان🔴

للرحالة العابد التقي احمد بن بلة القورماهي الشنقيطي - المولود في ١٨٥٢م بمدينة مهيدي عاصمة ولاية كوركول الموريتانية ، توفي في بلاد الشام في العام ١٩٢٦م و دفن بها .
يقع هذا السفر في عدة مجلدات و قد خص مجلدا كاملا عن اخبار و سير اهل و ملوك و شيوخ مناطق السودان القديمة ، حيث يسمي الكتاب احيانا بالفترة و احيانا بالشخصية أو الإعلام او المنطقة .
في الكتاب السابع و الذي سماه "احوال الناس" و في فصل بعنوان "سير الامم و الملوك للشيخ فرح ود تكتوك" :-
في أقوال و حكم الشيخ فرح و التي تعبر عن توقعاته في مستقبل الايام و الدهور يقول :

" السفر بالبيوت
و الكلام بالخيوت"

الشرح : يشير إلي عصر الاتصالات التقليدية غير الرقمية و "الخيوت" يقصد الخيوط اي اسلاك التلفونات و "البيوت" يقصد عربات السكة الحديد ، في ذلك الزمان لم تكن هناك هذه الهواتف التقليدية و لم تكن هناك وسيلة القطار فتنبا الشيخ بذلك و قد حدث بالفعل .
ينتقل و في نفس الفصل فيقول :

"يجي اليوم التتسختو جنس سختة
و ونستكم و كلامكم يبقي بالشختة"

الشرح : ينتقل الشيخ و حسب ما يتنبأ محدثا عن التطور التكنولوجي ، سبحان الله ، كان الشيخ يشير إلي عصر المعلومات و هذا الجوال و هذه الشاشات الذكية فيقول "كلامكم يبقي بالشختة" إشارة إلي تمرير الأصابع في التعامل مع شاشات الهواتف الذكية .
في نفس المجلد و في نفس الكتاب و في فصل بعنوان "سلاطين آخر الزمان" يقول :-

"يوماً يمنعوكم الحركة والحومة
و يقولولكم كمان تختو للقومة"

الشرح : سبحان الله و كان الشيخ تنبا بموضوع #القومة_للسودان ، فيقول "يمنعوكم الحركة و الحومة" في إشارة إلي حظر التجوال الذي يطبق هذه الايام ، و يقول "يقولولكم كمان تختو للقومة" اي يوجهونكم او يطلبوا منكم أن تتبرعوا لما يسمي ب
#القومة_للسودان.
و في تحول نوعي جاء في نفس المجلد و في فصل عن المشاكل والصحة العامة و تفشي الأمراض، تحدث الشيخ عن ما حل بالمناطق السودان من أمراض و مشاكل و تضجر الناس في ذلك الزمان المر الذي جعل الشيخ يقول لهم "أنتم الان في نعمة" و أن مقبل الايام سيكون اصعب و ينصح الذي سيحضرون هذه النغم و الويلات فيقول :

"في اليوم داك اختو ناس العِطيس
تنجو وما تموتوا زي الكفار فطيس"

و كانه يتنبأ بوباء "كورونا" و الذي ينتشر بالرشح و أشار له هنا "بالعطيس" و يقول اذا بعدتم من المصابين الذين "يعطسون" كثيرا فستنجو باذن الله و لن تموتوا بالملايين كما سيحدث للاوربيين الذين سيموتون "كفارا" و يشير لهم و يقول "فطيس".
و في نفس المجلد و الفصل ، و نسبة لتضجر الناس من المشاكل التي حدثت و صعوبة العيش حيث يتوافد الناس للشيخ و يشتكون من وضع المعيشة فيقول لهم "اصبروا ، حالكم الان طيب ، ربنا يستركم من الجايي" اي ان القادم اصعب و يقول في ذلك :

"انتو والحريم يوماتي تترصو للقمة
و تشيلو مواعينكم و تفتشو الجغمة"

الشرح : "تترصو للقمة" يقصد هذه الصفوف التي انتشرت امام الأفران و التي تضم النساء و الرجال ، أما "الجغمة" يقصد بها ازمة المياه و أن الناس يحملون مواعينهم و يتجولون بحثا عن الماء .
سبحان الله . رحم الله الشيخ فرح . و في نفس الباب يتنبأ الشيخ في اقواله عن الذي سيحدث بالنسبة لازمة الغاز فيقول :-

بعد ما كنتو تعوسو بي حطب الخلا
تبقوا تعبانين و تشيلو حدايداً مقفلا
تحوموا يوماتي و تتلتلو جنس تلتلا
لا تلقو نارا و العيش كمان زايد غلا

و شرح معني "حدايداً مقفلا" اي اسطوانات الغاز ، و شرح "لا تلقو نارا" يقصد انعدام الغاز .
في نفس المجلد و في موضوع بعنوان: "ضرورة اتباع توجيهات اولي الأمر مهما كانوا" ، يقول الشيخ فرح ود تكتوتك :-

"لو ما ما عملتو حسابكم و سمعتوا كلام السلطات بدل ويحيد ويحيد تمرضو بالعشرات".

سبحان الله ، الشيخ هنا ربما يستبق الأحداث و ينبه إلي ضرورة التزام الناس بالتوجيهات الصحية لان الأمر سيكون خطيرا ، و يحدث الآن نسمع في المؤتمرات الصحفية المتلاحقة كيف تزداد أعداد المصابين الأمر الذي ينبيء بخطر سيحدث اذا لم يلتزم الناس و قد قفزت الأعداد من إصابة و اصابتين في اليوم (ويحيد ويحيد) الي عشرات الاصابات في خلال اليوم . .
في نفس المجلد و في فصل ضرورة اتباع اولي الامر مهما كانوا لان في أتباعهم مصالح الناس و البلد يقول الشيخ فرح ود تكتوك :-

ان حضرت ذاك الزمان//
ما تبقي زولا عنيد غبيان//
اسمع كلام الحكما والسلطان//
تنجا من مرضاً سلطوا الرحمن//

طبعا المعني واضح . "الحكما" يقصد الأطباء و السلطان طبعا الحكومة. يقصد ضرورة التقيد بالتوجيهات الصحية و التزام البيوت و عدم التزاحم في الشوارع لكن للاسف ما نراه الان في الشوارع يبين العكس
. و يقول في نفس الفصل

يا وليداتي اتعلمو اللغات//
في زمنا يقولولو القحات//
راجعنلكم تاني الخواجات//

هذا الرجل لم يترك شاردة و لا واردة إلا تطرق لها، "القحات" ربما يقصد الحكومة الحالية و التي يقال لها اختصارا "قحت" ، طبعا "الخواجات" يقصد جماعة البند السادس .سبحان الله
و في الباب العاشر ، الفصل الثالث و تحت عنوان (ضياع البلدان و رميها في شماعة الكيزان) ، يقول الشيخ :-

زمنا كان سلم عليك انسان
تقوليه لا دي حركات كيزان

و لعل كلامه هنا لا يحتاج إلي شرح .
وجاء في نفس الفصل عن الشيخ فرح ود تكتوك :-

في آخر الزمان البنية تبقالكم وزيرة
تتلم مع الوليدات وكمان تعملها سيرة
اختوها هي لاها حكيمة ولاهاخبيرة
الزموا بيوتكم تنجو من هذه الشريرة
لا تخلي عجوزاً لا ولداً لا بنيتاًصغيرة

والشريرة يعني كورونا فيروس

🔴سيناريو الطريفي و حكومة الكفاءات و البشتنة 🔴

جلس مجموعة من اهالي حلة دبة التكل يتسامرون تحت ضوء القمر ، "طبعا مافي كهرباء" .
حامد ود العوض : اها يا الطريفي يا اخوي ات ود جاب السيد دة عينوه وزير ولائي والا وزير دولة و الا وزير عديييل كدة ..
الطريفي : عفو عفو يا ود العوض ود جاب السيد شنو الببعينوه وزير عديل علي الإيمان الجماعة المتحكرين فيها ديلك ما يدوهو فرقة .. لكن تعال جاي ارخي اضانك اللقولك شي بيناتنا الزويل دة مو كفاءة يعني من الكفاوات ، اية و الله .
يتدخل ود جار النبي : هلا هلا و الله يا الطريفي بقيت مثقف و كمان تعرف الكفاوات .
الطريفي : عفو يا ود جار النبي الكفاوات دي في زولا ما بعرفا .
ود جار النبي : اها كدي ورنا اياها .
الطريفي : الكفاوات دي يااالغبيان زي ما تقول كدي لمن الزول يكون متلقي حجج يقوموا يشغلوه بي شيتا كدي يكافو شره اها دي الكفاوات ، علي الطلاق مما يعينو اها السكتة الياها .
ود جار النبي : يعني اسة الجماعة البشييييلو و يعينو فوقن كل مرة ديل يعني دايرين يكافو شرهم و الله يا الطريفي اخوي جبتلك خبر .
الطريفي : الجماعة ديلك مو خربو البلد اسة جايبين ناس موحوماد ود جاب السيد الكفاوات ديل عشان يعدلوها .
ود العوض : علي الطلاق ليهن قريب السنة يسوطوا و يعجنوا فيها و الله التكتحن ما قدروا عليها، كل شيء يهبشوه يقولوا الجماعة مكجرنهن و عاملن لهم فيه عمل .
ود جار النبي : الله يجازي محنك يا ود جار النبي والله ات حقو يسووك وزير في رئاسة الجمهورية ..
الطريفي : تضحك عليا يا ود جار النبي . ات قايلا كتيرة علي الله .. عليا الإيمان بكرة بعد بكرة كدي يجي تعديل وزاري أن ما شفتني متحكرلك في داك اللانكروزم و جايطلك البلد شرق وغرب و شمال و جنوب ما تقول لي الطريفي تاني.. انت قايل شغل الوزراء دة شنو .. مو لاندكروزم و صرف بنزين و ونسات و مكالمات بالتلفونات و تحويل الرسائل الليلات الواسطات و دة ما ظنيتو دايرلو قراية و الا شهادات ..
ود جار النبي : انت من زمن اللاندوكرزيوم الناس اطوروا . اها يا الطريفي كدي خلنا من الخبير اللليل ود جاب السيد دة >> دحين داك مو عباس ود بتول ....
الطريفي : ايا والله ..
ود بتول : سلام اااود جار النبي .
ود جار النبي : عليكم السلام
ود بتول : الندخل في الموضوع طوالي ما في زمن ماسمعتو بالخبر دة يا ود جار النبي .
ود جار النبي : شنو دة كمان اااالمسيخيت ظنيتك بقيت متل الطريفي تجيب الخبارات.
ود بتول : و الله أمس محيميد ود التاية وليدو الفي السعودية داك رسلو ديجيتال و قالك كدي و شغلو وأول ما بدا وجابلك الجزيرة الخبر اللولاني قرار تعيين ود جاب السيد وزير تختيت .. أيا والله سمع اضاني دي ..
ود جار النبي : هع هع هع .. دااابك سمعت بالخبر دة .. علي الحرام الطريفي جابو لينا اول امس بالواسطات ..
ود بتول : الطريفي مو زول محن .. أها شنو الواسطات دة كمان ..
ود جار النبي : ماك عارف الواسطات .. هع هع .. دة شيتا كدي في التلفون البقولولو كدي (إشارة لمسح الاصبع للتلفون الذكي) .. و يجيبلك الخبر اللليل الوزراء و اللليل الحكومة و اللليل الحرب و اللليل الاجتماعات و اللليل أي شي .. والله الشي قبل ما يتم .. تسمع بو في الواسطات .
والله قالوا الجماعة مجتمعين اجتماع سري الليل اللجنة اللت الخرابة ديك و اتشاكلوا .. برضو جابوهو في الواسطات ..
ود بتول : هوووووي يا ود جار النبي خلك في حدودك قبل ما يجو الجماعة يودرو اترك و يودرونا معاك .. الشي دة نفوه وقالو دي فبركة ساااكت.
ود جار النبي : والله الدنيا دي حتي ود بتول بقي يتكلم في السياسة حسي عليك الله فبركة دي شن معناه .
ود بتول : هع هع هع ماك عارف الفبركة .. الفبركة دي التبيخ .. يعني زي ماتقول كدة زي البامية المفروكة هع هع هع .
ود جار النبي : كدي خلنا من دة دحين داك مو ود الاعيسر .
ود بتول : اية و الله و جاي مسرع كدي زي الجايبلو خبر .
علي ود الفضل : تعال تعال ااازول .. شن الخبر .
محمد ود الاعيسر : ها ناس انتو متكسرين هني و ما جايبين خبر و فريق لا فوق جايط.
علي ود الفضل : شن الحاصل اااالمنحوس .
محمد ود الاعيسر : الناس عاملين مظاهرة و قالوا دايرين يتمردوا عدييل كدة و يشيلو السلاح .
علي ود الفضل : الله لا كسبك دة كلام شنو دة .
محمد ود الاعيسر : قالو كيييفن بالكيف يعينو من فريق لا تحت ود البصير وزير للموية و ما يعينو زول من فريق لا فوق ..
علي ود الفضل : عليك الله شوف الغبيانين ديل .. نآن الزويل دة مو كفاءات و خبرة اكثر من ٢٠ سنة شغال بي حمارتو دي و يشيل في الموية بالخرج و يرحل لي ناس الحلة و يسقي فيهن علي الإيمان أكان صدقتو سوهو وزير علا تاني مانشوفلنا زولا عطشان في الولاية دي وكمان يريحلك البلد كلها الزويل مو خبرة أكان للشهايد و الله شوف عيني دي خاتيها تحت السرج الليل حمارتو ،،، .
محمد ود الاعيسر : الناس قالوا مالن و مال البلد هم بس لازم واحد من اولادن يبقي وزير .
ود الشيخ : هوي يا جماعة و الله انا سمعت ابوي الشيخ قال اولتمبارح أجتمعوا مع المسعولين وقالوا خلاص المشكلة دي محلولة.
محمد ود الاعيسر : محلولة كيفن قول لنا عشان نمشي نبشرن .
ود الشيخ : والله ابوي الشيخ قال الجماعة المسعولين قالو في نظام أسموا نظام الترضيات يعني زي ماتقول كدي يعينوا ليهم واحد من فريق لا فوق وزير دولة أو معتمد برئاسة الولاية و يمشي يقولك كدي و يخت ايدو في المصحف و يحلف لهم القسم و يسلموهو ديك الفارهة و تاني مادايرين منو حاجة .. بعد كدي المشكلة تكون اتحلت .
ود العوض : اوعي يكون المصحف الليل الجماعة الفاتو .
ود الشيخ : لا لا ظنيتو ويحيدا قديييم كدي قالوا ان ختيت فوقوا يدك علي الإيمان تتكجرلك لا يوم القيامة عشان كدة تشتغل دغري .
الجماعة : الحمد لله .. عاش نظام الترضيات عاش نظام الترضيات وان شاء الله البلد تروح شمار في مرقة .
ود اللمين : اها خلونا من دة الخزين ود السرة داااك البحلهن منو شنو و كيفن يكافو شره ..
ود الشيخ : ايا و الله الخزين وليد السرة بت الله جابو من الكفاوات و كمان عندو ضهر و وراه قبيلة ، عشان كدة قالوا خلقولو وزارة جديدة تكون مسئولة من حل المشاكل من ضمن صلاحياتها تكون مسئولة من الدرداقات و اول شيء بدابو مشي فريق الضبيبينة باقي ابراهيم ود مساعد متكاجر مع النور ود العازة فوق الدرداقات و الحمد لله حل المشكلة .
ود اللمين : الحممممممد لله و كيفن حلوها ،،
ود الشيخ : و الله قالو يبنولن موقف اللِيل درداقات جنب السويق القديم و يكون مسعول منو ابراهيم ود مساعد و يبنولن ويحيدا تاني في طرف القويز اللافوق و يمسكوه النور ود العازة و كل واحد يلملم موارد السويق . بس قالولن اوعاكم من التجنيب ، و كدة يادار ما دخلك شر ،،
ود اللمين : عفيت منك ااالخزين ات من قمت ماك حلال المشاكل . حرم دة التختيت الاستراتيجي و الا بلاش ،، علا يا ود الشيخ المرة دي كمان جبتلنا شيتا جديد الموارد يعني شنو و التجنيب يعني شنو .
الطريفي : والله يا ود ريا انت اصلك ما بتفهم .. أسع الناس يجوطو كل يوم و يلوصو في التلفزيون و الرادي و التلفونات و الجرايد و يقولولكن الناس لهطوا الموارد و الكفاءات جاية ترجعلكم حقكم و توقف التجنيب حماية للمال العام و انت لسة ما فهمت حاجة ..
ود ريا : والله ساامع علا لكن والله ماني خابرن قاصدين شنو والله هن في وادي ونحن في وادي .. نحن دايرين الكسرة و الويكة تكون رخيصة وبس والله تاني ما دايرين منهم شي .
الطريفي : اها يا ود ريا اللشرحلك الموارد .. شايف الكويم الليل الزبالة القاعد هنوك الليل منو .. مش هيل الارباب .. اها دي زي ما تقول كدة دي الموارد .. و مش وليدو الفضل مرة مرة كدي بشيل منو و يدسدس قدام اللوضة التحتانية ديك و ما بخبر ابوهو يعني زي ماتقول بالعربي كدي سرقة .. اهااا دة التجنيب البقصدوهو ..
ود ريا : الله يجازي محنك يا ااا الطريفي باقي انت ماك زول محن .. زمان ما قتلك حقو يعينوك وزير .. اسة عليك الله هم اخير منك بي شنو علي الطلاق يعينوك وزير علا تبشتنا ليهم بشتنة ..هي مش الشغلانة بشتنة والا شيتا آخر ..

نحو استخدام ادب في النشر بوسائل التواصل الاجتماعي

الملاحظ في وسائل التواصل الاجتماعي في الكثير من الأحيان يفتقر الناشر أو المعلق الي ادني الطرق الأدبية في حالة اختلافه مع منشور أو شخص أو زعيم و لا تجد هناك موضوعية في الكثير من التفاعلات مع منشور ما و في أحيانا كثيرة يتركون الموضوع و يرمون صاحبه بالانتماء الي جهة أو جهة أخري خاصة المنتمين للانظمة الحاكمة و الآخرين الذين يعارضونهم ، فأهل الحكومة اذا نشرت ما يغضبهم و لو كان حقيقة و لو أنهم يعلمون حقيقته فإنهم قبل اكمال قراءة منشورك يرمونك بانك معارضا للنظام و انك كذا و كذا ، و في الطرف الآخر اذا كان منشورك مؤيدا للنظام و لو كان حقيقة و الآخرون ممن يعارضون النظام يعلمون بحقيقته فإنهم من العنوان و قبل الخوض في ما كتبت يصنفونك بانك مع النظام و انك منتفع أو او او ).
ليتنا نتعاهد و نضع معايير و قواعد محددة نلتزم بها أخلاقيا و أدبيا و ليس بقوة القانون كالتي توضع في المجموعات المختلفة ،و اقصد قواعد تترك الشخص مع ضميره و خلقه و أدبه و قناعاته .
و هناك بعض الموجهات ليتنا نخوض في توسيعها و ترتيبها و تجميعها :
1🔴 عدم الخوض في الموضوعات و المسائل الشخصية للناشر أو الذي يختلف معنا في رأي أو فكرة .
2🔴 ادب الاعتذار في حالة إن أخطأ أحدنا يجب أن يكون شجاعا و يعود و يعترف بالخطأ . و في حالة اعتذار شخص ما فينبغي علينا قبول العذر .
3🔴 احترام الكبار سواء كان في العمر أو الخبرات او المكانة الاجتماعية أو الوظيفية مهما كانت . نختلف معهم لكن نجادلهم و نناقشهم بأدب و احترام .
4🔴 المراجعة قبل النشر للتصحيح فيما ننشر في الموضوع او اللغة .
5🔴 الإشارة إلي المصادر في حالة نقل موضوع او صورة و ذلك حفظا للحق الادبي و كذلك لمساعدة المطلعين للمزيد من المعرفة , إضافة للمسئولية القانونية و ما يترتب عليه ذلك .
6🔴 في حالة نقل موضوع او صورة ، بالإضافة إلي ذكر المصدر ، لا بد من التعليق و كتابة الرأي في المنقول و تاريخ النشرة الاولي ، و هل انت تؤيد ما ذهب إليه صاحب الموضوع ام لا ؟. و يحدث ذلك كثيرا في واتساب فتجد الشخص يقوم بإحالة موضوع أو صورة أو كاركاتير أو مقطع فيديو فيما يعرف ب (رسالة محولة) دون تعليق أو إشارة إلي المصدر أو تاريخ هذه" الرسالة المحولة" .
7🔴 تحاشي السب و القذف و الالتزام بالموضوعية و الحجة بالحجة و تقديم الأدلة و البراهين و المستندات المؤيدة للطرح أو الرد علي شخص مع استخدام عبارات جميلة و ذوق جميل لمن نختلف معهم في فكرة أو رأي كان نقول ( دعني اختلف معك اخي في ما طرحته و رأي كذا و كذا ) .
8🔴 صفحة الشخص هي بيته الذي يستضيف فيه الناس و الذين يختلفون في أشكالهم و الوانهم و أعراضهم و ثقافاتهم و أعمارهم، لذلك عندما ينشر الشخص شيئا في صفحته علي الذين يتداخلون أن يحترموا زوار هذا الشخص من الآخرين و احترام آراءهم و ذلك اما بالتعليق بادب و ذوق مع اختلاف الرؤية و الفكرة، أو، الاطلاع فقط و المغادرة أو ، إضافة شكل من أشكال الشعور التي توفرها لنا فيسبوك و التي تعبر عن الفرح أو الغضب لكن بدون تعليق مؤذي . لكن اذا كان المنشور في صفحة عامة فلك أن تكتب ما تشاء فالحكم هو قوانين الصفحة و ما يراه المشرف .