🔴بمناسبة محاصصات الولاة🔴

🔴بمناسبة محاصصات الولاة🔴
🔸️الحكاية بشتنة و الا شيتاً آخر🔸️
(اختيار المسئولين في بلادي)
جلس مجموعة من اهالي حلة دبة التكل يتسامرون تحت ضوء القمر ، زي الجماعة القاعدين في قناة النيل الازرق مع بت النمر .
حامد ود العوض : اها يا الطريفي يا اخوي ات ود جاب السيد دة عينوه وزير ولائي والا وزير دولة و الا وزير عديييل كدة ..
الطريفي : عفو عفو يا ود العوض ود جاب السيد شنو الببعينوه وزير عديل علي الإيمان الجماعة المتحكرين فيها ديلك ما يدوهو فرقة .. لكن تعال جاي ارخي اضانك اللقولك شي بيناتنا الزويل دة مو كفاءة يعني من الكفاوات ، اية و الله .
يتدخل ود جار النبي : هلا هلا و الله يا الطريفي بقيت مثقف و كمان تعرف الكفاوات .
الطريفي : عفو يا ود جار النبي الكفاوات دي في زولا ما بعرفا .
ود جار النبي : اها كدي ورنا اياها .
الطريفي : الكفاوات دي يااالغبيان زي ما تقول كدي لمن الزول يكون متلقي حجج يقوموا يشغلوه بي شيتا كدي يكافو شره اها دي الكفاوات ، علي الطلاق مما يعينو اها السكتة الياها . ماك شايف الزويل داك مما مسك التجارة اها السكتة الياها.
ود جار النبي : يعني اسة الجماعة البشييييلو و يعينو فوقن كل مرة ديل يعني دايرين يكافو شرهم و الله يا الطريفي اخوي جبتلك خبر .
الطريفي : الجماعة ديلك مو خربو البلد اسة جايبين ناس موحوماد ود جاب السيد الكفاوات ديل عشان يعدلوها .
ود العوض : علي الطلاق ليهن قريب السنة يسوطوا و يعجنوا فيها و الله التكتحن ما قدروا عليها، كل شيء يهبشوه يقولوا اللخيان مكجرنهن و عاملن لهم فيه عمل .
ود جار النبي : الله يجازي محنك يا الطريفي والله ات حقو يسووك وزير في رئاسة الجمهورية ..
الطريفي : تضحك عليا يا ود جار النبي . ات قايلا كتيرة علي الله .. عليا الإيمان بكرة بعد بكرة كدي يجي تعديل وزاري أن ما شفتني متحكرلك في داك اللانكروزم و جايطلك البلد شرق وغرب و شمال و جنوب ما تقول لي الطريفي تاني.. انت قايل شغل الوزراء دة شنو .. مو لاندكروزم و صرف بنزين و ونسات و مكالمات بالتلفونات و تحويل الرسائل الليلات الواسطات و دة ما ظنيتو دايرلو قراية و الا شهادات ..
ود جار النبي : انت من زمن اللاندوكرزيوم الناس اطوروا . اها يا الطريفي كدي خلنا من الخبير اللليل ود جاب السيد دة >> دحين داك مو عباس ود بتول ....
الطريفي : ايا والله ..
ود بتول : سلام اااود جار النبي .
ود جار النبي : عليكم السلام
ود بتول : الندخل في الموضوع طوالي ما في زمن ظنيتكم ماسمعتو بالخبير المالي البلد يا ود جار النبي .
ود جار النبي : شنو دة كمان اااالمسيخيت ظنيتك بقيت متل الطريفي تجيب الخبارات.
ود بتول : و الله أمس محيميد ود التاية وليدو الفي السعودية داك رسلو ديجيتال و قالك كدي و شغلو وأول ما بدا وجابلك الجزيرة الخبر اللولاني قرار تعيين ود جاب السيد وزير تختيت .. أيا والله سمع اضاني دي ..
ود جار النبي : هع هع هع .. دااابك سمعت بالخبر دة .. علي الحرام الطريفي جابو لينا اول امس بالواسطات ..
ود بتول : الطريفي مو زول محن .. أها شنو الواسطات دة كمان ..
ود جار النبي : ماك عارف الواسطات .. هع هع .. دة شيتا كدي في التلفون البقولولو كدي (إشارة لمسح الاصبع للتلفون الذكي) .. و يجيبلك الخبر اللليل الوزراء و اللليل الحكومة و اللليل الحرب و اللليل الاجتماعات و اللليل أي شي .. والله الشي قبل ما يتم .. تسمع بو في الواسطات .
والله قالوا الجماعة مجتمعين اجتماع سري الليل اللجنة اللت الخرابة ديك و اتشاكلوا .. برضو جابوهو في الواسطات ..
ود بتول : هوووووي يا ود جار النبي خلك في حدودك قبل ما يجو الجماعة يودرو اترك و يودرونا معاك .. الشي دة نفوه وقالو دي فبركة ساااكت.
ود جار النبي : والله الدنيا دي حتي ود بتول بقي يتكلم في السياسة حسي عليك الله فبركة دي شن معناه .
ود بتول : هع هع هع ماك عارف الفبركة .. الفبركة دي التبيخ .. يعني زي ماتقول كدة زي البامية المفروكة هع هع هع .
ود جار النبي : كدي خلنا من دة دحين داك مو ود الاعيسر .
ود بتول : اية و الله و جاي مسرع كدي زي الجايبلو خبر .
علي ود الفضل : تعال تعال ااازول .. شن الخبر .
محمد ود الاعيسر : ها ناس انتو متكسرين هني و ما جايبين خبر و فريق لا فوق جايط.
علي ود الفضل : شن الحاصل اااالمنحوس .
محمد ود الاعيسر : الناس عاملين مظاهرة و قالوا دايرين يتمردوا عدييل كدة و يشيلو السلاح .
علي ود الفضل : الله لا كسبك دة كلام شنو دة .
محمد ود الاعيسر : قالو كيييفن بالكيف يعينو من فريق لا تحت ود البصير وزير للموية و ما يعينو زول من فريق لا فوق ..
علي ود الفضل : عليك الله شوف الغبيانين ديل .. نآن الزويل دة مو كفاءات و خبرة اكثر من ٢٠ سنة شغال بي حمارتو دي و يشيل في الموية بالخرج و يرحل لي ناس الحلة و يسقي فيهن علي الإيمان أكان صدقتو سوهو وزير علا تاني مانشوفلنا زولا عطشان في الولاية دي وكمان يريحلك البلد كلها الزويل مو خبرة أكان للشهايد و الله شوف عيني دي خاتيها تحت السرج الليل حمارتو ،،، .
محمد ود الاعيسر : الناس قالوا مالن و مال البلد هم بس لازم واحد من اولادن يبقي وزير .
ود الشيخ : هوي يا جماعة و الله انا سمعت ابوي الشيخ قال اولتمبارح أجتمعوا مع المسعولين وقالوا خلاص المشكلة دي محلولة.
محمد ود الاعيسر : محلولة كيفن قول لنا عشان نمشي نبشرن
. ود الشيخ : والله ابوي الشيخ قال الجماعة المسعولين قالو في نظام أسموا نظام الترضيات يعني زي ماتقول كدي يعينوا ليهم واحد من فريق لا فوق وزير دولة أو معتمد برئاسة الولاية و يمشي يقولك كدي و يخت ايدو في المصحف و يحلف لهم القسم و يسلموهو ديك الفارهة و تاني مادايرين منو حاجة .. بعد كدي المشكلة تكون اتحلت .
ود العوض : اوعي يكون المصحف الليل الجماعة الفاتو .
ود الشيخ : لا لا ظنيتو ويحيدا قديييم كدي قالوا ان ختيت فوقوا يدك علي الإيمان تتكجرلك لا يوم القيامة عشان كدة تشتغل دغري .
الجماعة : الحمد لله .. عاش نظام الترضيات عاش نظام الترضيات وان شاء الله البلد تروح شمار في مرقة .
ود اللمين : اها خلونا من دة الخزين ود السرة داااك البحلهن منو شنو و كيفن يكافو شره .
ود الشيخ : ايا و الله الخزين وليد السرة بت الله جابو من الكفاوات و كمان عندو ضهر و وراه قبيلة ، عشان كدة قالوا خلقولو وزارة جديدة تكون مسئولة من حل المشاكل من ضمن صلاحياتها تكون مسئولة من الدرداقات و اول شيء بدابو مشي فريق الضبيبينة باقي ابراهيم ود مساعد متكاجر مع النور ود العازة فوق الدرداقات و الحمد لله حل المشكلة .
ود اللمين : الحممممممد لله و كيفن حلوها ،،
ود الشيخ : و الله قالو يبنولن موقف اللِيل درداقات جنب السويق القديم و يكون مسعول منو ابراهيم ود مساعد و يبنولن ويحيدا تاني في طرف القويز اللافوق و يمسكوه النور ود العازة و كل واحد يلملم موارد السويق . بس قالولن اوعاكم من التجنيب ، و كدة يادار ما دخلك شر ،،
ود اللمين : عفيت منك ااالخزين ات من قمت ماك حلال المشاكل . حرم دة التختيت الاستراتيجي و الا بلاش ،، علا يا ود الشيخ المرة دي كمان جبتلنا شيتا جديد الموارد يعني شنو و التجنيب يعني شنو .
الطريفي : والله يا ود ريا انت اصلك ما بتفهم .. أسع الناس يجوطو كل يوم و يلوصو في التلفزيون و الرادي و التلفونات و الجرايد و يقولولكن الناس لهطوا الموارد و الكفاءات جاية ترجعلكم حقكم و توقف التجنيب حماية للمال العام و انت لسة ما فهمت حاجة ..
ود ريا : والله ساامع علا لكن والله ماني خابرن قاصدين شنو والله هن في وادي ونحن في وادي .. نحن دايرين الكسرة و الويكة تكون رخيصة وبس والله تاني ما دايرين منهم شي .
الطريفي : اها يا ود ريا اللشرحلك الموارد .. شايف الكويم الليل الزبالة القاعد هنوك الليل منو .. مش هيل الارباب .. اها دي زي ما تقول كدة دي الموارد .. و مش وليدو الفضل مرة مرة كدي بشيل منو و يدسدس قدام اللوضة التحتانية ديك و ما بخبر ابوهو يعني زي ماتقول بالعربي كدي سرقة .. اهااا دة التجنيب البقصدوهو ..
ود ريا : الله يجازي محنك يا ااا الطريفي باقي انت ماك زول محن .. زمان ما قتلك حقو يعينوك وزير .. اسة عليك الله هم اخير منك بي شنو علي الطلاق يعينوك وزير علا تبشتنا ليهم بشتنة ..هي مش الشغلانة بشتنة والا شيتا آخر ..

✅و هل الاحتياطات الصحية في المواسم فقط؟! ✅

✅و هل الاحتياطات الصحية في المواسم فقط؟! ✅
قابلني أحدهم قبل يومين و كنت مستخدما الكمامة ، فقال لي :
"الموضوع دو خلاص انتهي" ، يقصد طبعا جائحة الكورونا ، و لا داعي بعد ذلك لاستخدام الكمامات .
قلت له :"يعني اكرم مشي معناها خلاص الموضوع انتهي ، و حتي لو انخفضت كورونا أو انتهت . يجب أن تكون جائحة كورونا و ما صاحبها فرصة للوقوف علي الكثير من العادات و السلوكيات.
🔴 ((عليكم بالمحافظة علي انفسكم .. لا تنتظروا سلطة او مؤسسة حكومية او معتمدا يراقب لكم صلاحية ماكلكم و مشربكم ، انتم اولي بالمحافظة علي انفسكم و اهليكم ))
🔴 اتمني ان توضع تذكرتي هذه كديباجة تقرأ كل صباح ( بعد التحصينات و الأوراد و الاذكار طبعا) عند الخروج الي العمل . المدارس . الجامعات . رياض الأطفال .. السفريات الداخلية .
🔴 التكرار هو ذكر الكلمة او الجملة او المقال اكثر من مرة ، و له عدة فوائد اذكر منها :-
* تأكيد الامر و لنا أسوة في رسول الله صلي الله عليه و سلم إذ جاء في حديث حسن الصحابة حيث كرر عليه الصلاة و السلام قال امك قال امك قال امك ثلاثة مرات . و قبل ذلك الرب سبحانه و تعالي ايضا يكرر في قرانه الكريم و في الكثير من الآيات و منها "الهاكم التكاثر حتي زرتم المقابر كلا سوف تعلمون ثم كلا سوف تعلمون" .
* و من فوائده انك تذكر الناس للاحتراز او التنبيه من شيء ما كأن تقول بالدارجي : "ياجماعة الدبيب الدبيب" أو "الحرامييي الحرامييي" .
*و كذلك من فوائده النصح و التوجيه و الحث إلى الفضائل و جميل الاعمال و الخصال، كقوله تعالى: (أولى لك فأولى ثمَّ أولى لك فأولى).
*و كذلك من فوائده التضخيم و ادخال الرعب في المرء من امر تردده له و جاء في القرآن الكريم : (الحاقّة ما الحاقّة وما أدراك ما الحاقة).
🔴 مع عاداتنا و سلوكياتنا الكثيرة غير القويمة نسال الله ان يلطف بحالنا الذي هو ادري به و ما نحن عليه في الأسواق في كرور في سوق ستة في شعبي ام درمان و شعبي الخرطوم و مايو و سوق بحري جاكسون و صابرين و سوق ليبيا ، و السوق المحلي و ما ادراك ما السوق المحلي مياه آسنة و قازورات و بينهما و عليهما تعرض المأكولات من خضر و فاكهة ، و ما نتعامل به مع مطعمنا في العرض و التعامل مع المخابز و محلات الاكل و انواعه من خضر و فواكه مفروشة و دردقو و مانجو مقطعة و مدائد و ام جنقر معروضة لذلك و في عباداتنا بدءا من الوضوء في الأسواق في اناء واحد (الطشت) ذلك أن كل من هب و دب يتمضمض ويدخل يده حتي الحلقوم ثم يعيدها الي الطست ( مع حركة بالفم واللسان لايمكن كتابتها بالحروف ،، ربما تبدا بحرف الخاء ) و هنا بالطبع يأخذ من لعابه و يعيده الي الطست و لا ندري ما باللعاب و ربما تكون هناك جروح في اللثة و بعض الدماء السائلة مع اللعاب فيرجع يده الي الطست و قد أخذت بعضا من هذا اللعاب و ربما الدماء ، ثم يستنشق بالانف ثلاثا و ربما ينثر ماتبقي من مياه الأنف الي داخل الطست و ربما يكون قد انزل شيئا من مكنونات انفه الي الطست ، ناهيك عن ما يمكن أن يوجد في الأيدي من أشياء كالتعامل مع النقود ، و اثناء مسح الوجه طبعا سيمرر بالعينين و يلامس ما بهما اذا كان هناك رمدا او جلوكوما بالطبع سياخذ فيروسهما و يعيده الي الطست و ربما يأخذ شخص بيده و يلامس عيونه بما تركه الشخص المريض وطبعا الطست يتوضأ به مايقارب ستة الي سبعة أشخاص في المجموعة وقد يزيد عدد المجموعات عن العشرين و كل شخص يقوم بسبعة و عشرين عملية ادخال في الطست أي أن هناك مايقارب أو يزيد من 3780 عملية إدخال وإخراج للأيدي ( 7 أشخاص × 20 مجموعة × 27 حركة من بداية غسل اليدين الي المرفقين ثلاثا ثم المضمضة ثلاثا وهكذا حتي ننتهي بالارجل وما ادراكا ما الارجل (كمان لو بقت لابسة شرابات دة كلام تاني ) لذلك إحذروا الطشاطة في الوضوء وعليكم بالإباريق المعلقة. و لو كمان كنتم جاهزين متوضئين من البيت فذلكم الضمان ذلكم الضمان .. و شيخ عمر يقول (مابتجينا حاجة) و لا أدري هل نسي قوله سبحانه و تعالي قال : {وَلا تُلْقُوا بِأَيْدِيكُمْ إِلَى التَّهْلُكَةِ} .
عليكم بالمحافظة علي انفسكم .. لا تنتظروا سلطة او مؤسسة حكومية او معتمدا يراقب لكم صلاحية ماكلكم و مشربكم : -
🔴 لا تشتروا غذاءكم من الذين يعرضون في العراء في الطرقات في الزحام مع الاتربة و الغبار و بالقرب من اكوام القمامة و الاوساخ .
🔴 لا تاكلوا من الذين يجلبون الماكولات المطبوخة الا بعد التاكد من ادواتهم و ايديهم و المواد التي يستخدمونها من زيوت و لحوم و خضر و فواكه ..
🔴 لا داعي لشراء المعلبات التي يمكن الاستغناء عنها و التي ليست ضرورية خاصة تلك المستوردة حتي و لو كان تاريخ الصلاحية صحيحا فليس هناك ضمان ان تكون مزورة هنا او هناك .
🔴 عليكم بالمنتوجات المحلية خاصة الخضر و الفواكه الطازجة و التي بحمد الله متوفرة و اسعارها زهيدة مقارنة بالمستورد .
🔴 علموا اطفالكم حمل اكواب الشرب الخاصة بهم و عدم استخدام الاكواب التي يستخدمها العامة .
🔴 حذروا اطفالكم من مخاطر الاكل و الشرب من الباعة الجائلين .
🔴 احذروا و تاكدوا من ما يسمي بحليب اليوم و الزبادي الطبيعي الذي لا تستخدم فيه ادني انواع المواصفات .
🔴 تاكدوا ان اصحاب العصائر لا يستخدمون الفواكه الفاسدة و خلطها مع الجيدة و وضعها في مواعين كبيرة و الافضل شراء التي تخلط امام اعينكم مباشرة اذا كان لا بد ..
🔴 احذروا من الشرب بالاكواب التي تستخدم عدة مرات و يتم غسلها باناء واحد و ماء لا يتم تغييره .
🔴 احذروا من الذين تشترون منهم الخبز او الماكولات التي توضع في الاكياس من استخدام لعابهم في فتح الاكياس ثم استخدام ذات الاصابع في النقود و التعامل مع الخبز .
🔴 احذروا من بائعي و صانعي الطعمية و الزلابية ضعاف النفوس الذين يستخدمون الزيت عدة مرات و يستخدمونه في اليوم التالي .
🔴و نضيف حاجات كورونا .. الكمامات .. غسيل الأيدي. تحاشي الازدحامات و الغبار .. الإكثار من الوضوء .. شرب عصير الليمون الدافيء.. حمل المطهرات لمسح الأيدي بعد الخروج من المشافي و غيرها . "اووووعكم من الوضوء من الطشاطة بتاعة الأسواق".
🔴 مرة اخري لا تنتظروا مسئولا او محلية او سلطة تراقب لكم الذين يصنعون الماكل و المشرب فانتم اولي بالمراقبة🔴
🔴و لا بد من إعادة التذكير :-
🔴 و رباعية :-
السبهللية الكثيرة يا اخواني بعيد خلوها//
و نصيحتي غسيل اليدين بالصابونة ماااتملوها //
ممنوع الزحام و حوامة السوق كمان اختوها //
اقعدوا في البيوت و بالصلاة علي النبي النفوس احموها//